وفى حموتها كده ...ننزل بأول يوميه ....وهى تخص الآباء والأمهات وأهالى الطفل اللى عنده معاناه ما ...ونقول بسم الله ...
الطفل المُعاق ...هو الشخص الأكتر عُرضه للكُفر والعياذُ بالله ...لأنه بمنتهى البساطه وبدون تفكير بيسأل ...هو ليه ربنا عمل فيا كده !!! أنا عملت إيه !!! ولما تقوله إحمد ربنا ...ده كده مميزك ...يقولك ...مميزنى إيه ...ده معلم عليا وتاعبنى ومخلينى ناقص حته ...ليه كده !!! أنا عملتله إيه؟؟ لازم تكون عندك حُجه وقدره على الرد ....لازم تكون بجد عارف وفاهم وواثق من الرد ...لازم تكون منطقى فى الرد ...قضاء الله وقدره يجوز نستوعبه إحنا الكبار الراشدين ..وساعات بنعترض والله عليه ...لكن الصغيرين لابد أننا نكون كلنا حكمه فى الرد عليهم ...ولو هنتكلم فى إن إرادة ربنا مش ضرورى يكون ليها منطق بشرى ...وليها سبب ربانى ..وله فى ذلك حِكم ...يبقى لازم نحاول نبسط الفكره ونوصلها بطريقه نقنع بيها الطفل .... لازم كمان طول الوقت نفكر فى العوض ..ازاى أقدر أعوض الطفل ده عن سنين عمره اللى بتضيع فى ألم ..وعلاج وعذاب هو ملوش ذنب فيه ...إزاى كل أفراد الأسرة تكون داعمه ليه ...مش مدلعاه لكن واقفه جنبه وحاسه بيه ...ومنغير أڤوره ...مش انت بطل بس ...ومش انت مختلف ...هو صحيح بطل ومختلف ومتحمل حمل ميتحملوش حد كبير وواعى وقانع ...لكن لازم فعلا ندور على الأجزاء المنوره التانيه فيه ...ربنا أراد ياخد منه حاجه لكن أكيد فيه كتير غيرها .....وممكن أصلا يستغل إعاقته دى ...فى إنه يتحداها وميعملهاش حساب ...فى رأيى الشخصى أصعب أنواع الإعاقات على الإطلاق... هى الإعاقة النفسيه ...الناس اللى مبتحسش ومبتستوعبش ومبتتعلمش من أخطائها ...والناس اللى مش عارفه قيمة الحياه ...ومش عارفه تعيشها ...والناس اللى مش مقدرين ستر ربنا ليهم ووقوفه جنبهم ...والناس اللى بتبقى عندها كنز هيدخلها الجنه زى طفل معاق ..وينسوا وجوده ويبقوا بيتعاملوا معاه على أنه كم مهمل وبركه ...ويبوسوه ويحطوه جنب الحيط .... أو يخبوه عن الناس ...ويبقوا مبيتكلموش عنه ولا بيخرجوا بيه ولا عملنله أى نشاط .....
كلام وصلتله من تجربتي الشخصيه ...وعندى كلام كتير لسه ...والفتره الجايه ...هفضل أكتب فى سلسلة فجر دى ...لعلى أكون سبب فى إستيعاب الناس اللى عندها حالات زى فجر ...وفجر كمان هيشارككوا يومياته ويعلم صحابه الاراده والعزيمه ...وازاى نحول اى الم وصعب ومحنه لمنحه جميله ربانيه وقدرة مختلفه انسانيه 
......يتبع ......