حد يعرف لماذا لم يشم عادل الورد؟
ارى الامر من وجهة نظر اخرى فالامهات يعتقدن ان الطفل له رصيد ١٠٠ درجه مثلا و نحن ننقصه (بتاع الماث منقصها درجتين) والواقع ان الطفل يأتي بدون رصيد و يزداد كلما حقق نجاح او انجاز .. الدرجات تقيس مدى تقدمه علميا في المطلوب منه معرفته ولا تقيس مدى كونه انسان و له عقل و مشاعر .. الدرجات تقيس نسبة ما عرفه بالنسبة لما كان يجب ان يعرفه ... فلا كثرتها دليل ذكاء ولا قلنها دليل غباء انما دليل انه يتقبل و يفهم الرياضيان التي تم تدريسها له ولكن ربما انه لايفهم الرياضيات لكنه عبقري في الدراسات .. اعرف معلم اجيال محترم كان يقول" لو امتحنا الكمبيوتر هيجيب ١٠٠% لانه مبيفهمش انما انت بتغلط عشان بتفهم فبتفكر فاحيانا تفكر غلط" .. وطبعا الكلام ده ممكن ميعجبش ناس كتير لكن بعد ظهور صوفيا الانسان الالي و تعرضها لموقف انها سكتت تماما لان النت فصل عنها ومعرفتش تجاوب عرفنا انه يعني لو ابنك متصل بالانترنت كان هيجاوب كل حاجه صح انما هو مش انسان الي ... هو بيحلل و يفهم و يفكر..
انا شفت اطفال جاوبوا غلط لانهم فكروا (هو ازاي كل اسئلة الاختيار من متعدد اجابتها اول واحده اكيد غلط) فراح مختار غلط لانه حاول يحط نفسه مكان واضع الامتحان ..ده ذكاء ولا غباء؟
يا جماعه الدرجات بتاعة الامتحانات مش مطلقه هي درجات نسبيه عرف يجاوب قد ايه من اللي مفترض انه يجاوبه صح وفي هنا بقى مشكله غريبه يقولك مينفعش الطفل ياخد درجه نهائيه في التعبير (ازاي ياخد درجه نهائيه هو يعني نجيب محفوظ ولا طه حسين ؟) الدرجه مش مرجعيتها العظماء دول مرجعيتها هو عارف يستخدم المفردات اللي درسها و يكتبها صح و باستخدام قواعد صح ومكون جمل مفهومه ولا لأ انما انا مش عامله مقابله عشان يبقى صحفي بجريدة الاهرام ...
الدرجات مقياس مايعرفه مما درسه وليس ما يعرفه مقارنة بالحضاره الانسانيه .
اتركوا لاطفالكم مساحه للخطأ فمن الاخطاء نتعلم و الموهوب في علم او فن ياخذ فرصته ومنطلبش من الفراشه عسل ولا من النحله اجنحه جميله كل مخلوق عنده موهبه في جانب او اتنين مفيناش حد موهوب في كل حاجه عشان نطلب من اطفالنا كده .
وخدوا بالكم الدرجات هي عنصر واحد في حياة الطفل ولا داعي للمقارنات !
وعشان كده كان لازم يبقى فيه #تعليم٢