دكتور كمال رحب بينا وسلم على فجر وعلطول دخل فى الموضوع وكأننا فاهمين ...فضل يتفرج على ماشية فجر وبعدين كشف عليه ...وقالنا كده فى وشنا ...أن ابننا سى بى ...وكنا اول مره نسمع المصطلح ...وشرحهولنا ...أنه شلل دماغى ودى حاجه فجر مولود بيها وبتحصل لعدة أسباب ...وإتسألت منه سؤال مهم ...وده من أهم الأسئلة اللى كنت بتسألها بعدها فى رحلة علاجه كلها ...واللى لازم كلنا ناخد بالنا منها ..( هو إزرق اول ما اتولد ؟؟) طبعا انا معرفش وكريم مدخلش معايا أوضة العمليات وقت ولادة فجر ...وده اللى خلانا فى ولادة ابنى التانى على... كريم أصر يدخل أوضة العمليات علشان يشوف بعينيه على وهو نازل ويتطمن على كل حاجه بنفسه أنه مزرقش وانه عيط وأنه محصلش اى حاجه غير عاديه ...
اليوميه انهارده.. مختلفه شويه ومهمه ...
مش بس عشان اكتشفنا فى اليوم ده حاجه ممكن تكون غيرت مسار حياتنا كله ...كمان علشان من اول اليوميه دى هيبقى كلامى موجه للأمهات والابهات اللى عندهم حالات سى بى ...وننقلهم خبرتنا يمكن تفيدهم ...اهم من مجرد انى بحكى حدوته ...ومن اول اليوميات الجايه هنعتبرها زى نصائح كده ومعلومات نعرفها يمكن تفيدنا ....ومن هنا ابتدى المشوار







....يتبع....